पोषणआहारात मायक्रोग्रीन्सचा वापर....

 

           शालेय पोषणआहारात  मायक्रोग्रीन्सचा वापर....

       जिल्हा परिषद प्राथमिक शाळा,वांझोळे शाळेच्या शालेय पोषण आहारात मायक्रोग्रीन्सचा म्हणजे अल्पकालीन भाजीपाल्याचा वापर करण्यात येत असून त्यामुळे विद्यार्थ्यांना सकस व सर्व पोषकतत्वयुक्त असा आहार मिळत आहे. मायक्रोग्रीन्स म्हणजे मोड आलेल्या धान्याच्या पुढची आणि छोट्या रोपांच्याही अलिकडली अवस्था. (रूजलेल्या बियाणाला जी पहिली दोन पाने येतात ती आणि त्यानंतरची जास्तीत जास्त दोन पाने आलेल्या अवस्थेला जो कोंब असतो.)

मायक्रोग्रीन्समध्ये पोषक घटक मुबलक प्रमाणात असतात. त्यांच्यातील पोषक घटक अर्क स्वरुपात असतात. पूर्णपणे वाढलेल्या भाज्यांच्या तुलनेत सूक्ष्म जीवनसत्वे, क्षार व अँटिऑक्सिडेंट्सची पातळी अधिक असते प्रत्येकमायक्रोग्रीनमधील पोषक घटकांमध्ये थोडाफार फरक असला तरी, बहुतेक प्रकारांमध्ये पोटॅशिअम, लोह, झिंक,    मॅग्नेशिअम आणि तांबे हे घटक मुबलक प्रमाणात असतात. पूर्ण वाढ झालेल्या भाज्यांच्या तुलनेत मायक्रोग्रीन्समध्ये चार पट जास्त पोषणमूल्य असतात.

                  मायक्रोग्रीन्स व अंकुरित धान्य फरक-   मायक्रोग्रीन्स जमिनीत उगवतात व वाढतात तर      अंकुरीत धान्य पाण्यात भिजवून मग त्यांना मोड आणले जातात. मायक्रोग्रीन्सची वाढ होण्यासाठी भरपूर सूर्यप्रकाश आणि पाणी लागते तर अंकुरण प्रक्रियेसाठी उजेडाची आवश्यकता नसते. मायक्रोग्रीन्स वाढण्यासाठी एक ते तीन आठवडे लागतात तर धान्य अंकुरित होण्याची प्रक्रिया लवकर होते.' मायक्रोग्रीन्सची पाने व देठ खाण्यासाठी वापरतात तर अंकुरीत धान्यांच्या बिया. अंकुरित धान्याच्या तुलनेत मायक्रोग्रीन्स अधिक पौष्टिक आणि सुरक्षित आहेत.